Su Comune comintzat is protzedimentos pro megiorare carrera Mascagni e s’impignat pro su sotziale e sa seguresa istradale

Image: 

 

 

In s’ùrtima seduta de su cussìgiu comunale s’amministratzione ghiada dae su Sìndigu Andrea Abis at deliberadu a s’unanimidade s’achistu de s’àrea a dae in antis de sa Parròchia de su Sacru Coro e sa carrera Mascagni de propiedade de sa crèsia. Custa cosa est istada fata pro megiorare s’àrea urbana ogetu de unu progetu, chi s’at a fàghere dae inoghe a pagu tempus, acapiadu a su Pianu Natzionale de Ripresa e Resilièntzia.

Comente giai naradu in su mese de martzu, s’amministratzione comunale at partetzipadu cun resurtados bonos a is bandos de su PNRR. Duos pertocant su cumpartu nido- infàntzia,  pro megiorare s’asilu nido de carrera Amsìcora e s’iscola de s’infàntzia de Solanas, su de tres imbetzes si còllocat in intro de su programma “Seguru, birde e sotziale: megioria de s’edilìtzia residentziale pùblica”, cun su cale su Comune at otènnidu unu finantziamentu de duos milliones de èuros pro is traballos de megioria de is domos  E.R.P. de carrera Mascagni.

Su progetu previdet de nde ghetare a terra e torrare a fraigare is allògios residentziales, pro  assegurare is cunditziones de calidade abitativa, atzessibilidade e seguresa chi oe non ddoe sunt. Su comune at partetzipadu a su bandu proponende unu co-finantziamentu de 21mìgia èuros pro sa progetatzione.

S’amministratzione comunale at però istabilidu de ismanniare sa megioria a totu s’àrea, a manera de isòrbere pro semper unu nodu urbanu mai isortu.

“Amus faeddadu cun sa  Parròchia e cun sa Cùria pro un’acordu chi previdet sa bèndida de una parte de s’àrea de propiedade de sa Crèsia – at ispiegadu in su cussìgiu comunale su Sìndigu Andrea Abis -, a manera de pòdere operare liberamente e garantire un’intrada mègius a sa palatzina e intervènnere a manera detzisa fintzas in sa viabilidade, cun sa delimitatzione in seguresa de sa propiedade de sa Crèsia. S’interventu pro tantu previdet a un’ala sa megioria sotziale e a s’àtera cussa urbana, cun benefìtzios pro is chi istant in s’istrutura ma fintzas pro is tzitadinos residentes in sa zona e de sa matessi parròchia”.

S’interventu, chi cunsistet in una còmpora-bèndida a caràtere simbòlicu, ca su Comune còmporat s’àrea a su prètziu de un’èuru, previdet fintzas s’installatzione de s’illuminatzione.

In intro de is 2 milliones de èuros ddu at una parte de destinare a s’allògiu de is famìllias chi istant in sa palatzina pro totu su tempus de is traballos de acontzu. In su cussìgiu comunale est istada aprovada a s’unanimidade fintzas sa variatzione de su bilàntziu de duos milliones de èuros, previdida in su triènniu 2022/2024, chi previdet un’interventu mannu in su capìtulu de is investimentos chi pertocat s’Unione de is Comunes Costa de su Sinis Terra de Mont’e Prama pro is pistas e is caminamentos tziclu-pedonales, is percursos naturalìsticos in s’istagnu, s’avaloramentu de Santu Srabadoi de Sinis, sa megioria de s’asilu nido comunale, s’adatamentu de su tzentru polivalente e su recùperu de is impiantos isportivos de carrera Tharros.

In prus sunt prevididos interventos de manutentzione istraordinària de sa rete pro 500 mìgia èuros, cun unu prèstidu pro fàghere fronte a sa situatzione de is istradas male postas, calicuna de custas est in cunditziones de degradu.

Parte de sa manovra est dedicada a su sotziale, e pertocat is contributos a is famìllias pro s’agiudu pro su pagamentu de su cànone de locatzione, a is ispesas prevididas pro inserire is persones antzianas in is istruturas protetas e in is RSA. Intre is ispesas ddoe sunt fintzas cussas chi pertocant su bancu alimentare e s’agiudu a sa pràtica isportiva de is giòvanos chi tenent pagas possibilidades.

Si agiunghent in fines is ispesas pro comporare is terras a usu tzìvicu, s’assestamentu generale de is ispesas de su personale e unu progetu de s’Àrea Marina Proteta fatu paris cun s’Universidade de Trieste.

Pro s’annu 2023 faghent parte de sa manovra fintzas is ispesas pro is cantieris Lavoras.

 “Custa variatzione de bilàntziu est significativa meda ca portat mesuras de importu pro su sotziale. Si tratat de mesuras comintzadas in tempus de Covid e chi cherimus torrare a propònnere a càrrigu de su bilàntziu comunale pro agiuare is sugetos prus dèbiles in unu tempus difìtzile, comente betzos, famìllias cun rèdditu bassu e pitzinnos chi bivent in famìllias chi non resurtant a parare fronte a is ispesas isportivas de is pitzocos o a is ispesas pro is alimentos” at naradu su Sìndigu Abis.

“Àtera mesura de importu est cussa chi pertocat is ispesas pro sa seguresa, pro intervènnere in is istradas chi non sunt incatramadas dae tempus meda, fintzas dae trinta annos, e ant acabadu su tziclu ùtile issoro – at concruidu Abis -. S’aumentu de is ispesas nos custringhet oe a fàghere unu prèstidu de mesu millione de èuros cando in antis bastaiat sa metade ma a dolu mannu non tenìamus ispàtzios finantziàrios de dèpidos. Amus leadu parte a su bandu regionale pro is asfaltos ma pro como non semus in sa graduatòria de is benefitziàrios. Isperamus chi torrent a finantziare, ma in su mentres partimus cun sa firma de su prèstidu. Apenas ant a arribare is finantziamentos de sa Regione tenimus giai is progetos prontos pro finire s’interventu  generale finas a 800 mìgia èuros”.

(M.G.S.)

 

Tipo di notizia: 
notizie