Partint is traballos de bonìfica pro nche fàghere isparire s’ecomostro in Punta Pirastu

Image: 

 

 

Sunt partidos is traballos pro nde ghetare a terra e bonificare is fràigos abusivos chi dae annos meda faghent dannu a sa parte orientale de s’istagnu de Crabas in localidade  “Punta Pirastu”.

Unu progetu de gherra a s’abusivismu, de bonìfica ambientale dae s’amiantu, de megioria de su paesàgiu chi bidet sa lughe e chi nch’at a ispèrdere pro semper un’elementu de crititzidade manna pro su territòriu. S’amministratzione ghiada dae su Sìndigu Abis in fatis at dadu su via a s’interventu de isfaghimentu de is cuiles abusivos e pro nche ispèrdere tonnelladas de tzimentu amiantu, a pustis de àere tentu duos finantziamentos: su primu est unu contributu de 90 mìgia èuros dae su Ministeru de s’Internu pro nche ispèrdere òperas abusivas; su segundu est unu finantziamentu regionale de 160 mìgia èuros pro interventos de bonìfica de s’amiantu, pro unu totale disponìbile de 250 mìgia èuros.

S’istrutura est cumposta dae capannones e magasinos chi in is annos passados fiant destinados a cuiles e fiant impreados dae aziendas de su logu. Custu fatu at tentu un’isvilupu giuditziàriu e pro tantu ant decraradu s’istrutura abusiva e ant cramadu in càusa is propietàrios. Dae tando s’istrutura est abbandonada isetende de nde la ghetare a terra.

“Oe est una die istòrica, ca si serrat unu capìtulu crìticu dae annos meda e chi est andadu a dae in antis in is àulas de is tribunales finas a s’òrdine a su Comune de fàghere a manera de nde ghetare a terra s’istrutura abusiva e de ismaltire totu is refudos, a manera particulare s’amiantu. Si ponet fine a unu problema de legalidade e de impatu ambientale e de salude chi dae tempus meda pertocat custu chigione de Paradisu” at decraradu su Sìndigu Andrea Abis.

S’interventu est istadu istudiadu a fine a fine e previdet de nche bogare 4 mìgia metros cubos de fràigos abusivos e 1500 metros cuadros de coberturas de amiantu.

Cuntentu pro custu interventu su presidente de s’Assòtziu regionale Ex Espostos Amiantu de Aristanis Giampaolo Lilliu: “Est unu signale de importu in is cunfrontos de is tzitadinos – at naradu, andende a su logu de sa bonìfica -, semus in una zona paesagìstica protègida e su nch’àere frantu custu ecomostro est de importu mannu pro sanare s’ambiente in defensa de su deretu a sa salude e de tutela ambientale. Isperamus chi s’amministratzione sigat cun fainas comente cussa chi comintzat oe”.

Un’elògiu arribat fintzas dae parte de s’Arma e de su Corpus Forestale de Vigilàntzia Ambientale, ambos presentes in sa mangianada.

 “Su traballu nostru cunsistet in unu monitoràgiu, controllu e defensa costante de su territòriu, e est de importu mannu a bìere chi su traballu nostru sighit cun interventos cuncretos de rimotzione. Inoghe semus in un’àrea SIC de importu mannu cun sa presèntzia de s’istagnu, chi devet abarrare sana e genuina, pro tutelare su consumadore finale de su pische”.

Fiant presentes fintzas is rapresentantes de sa setzione provintziale de Itàlia Nostra Sinis Crabas, is assessores Alessandra Pinna, Enrico Giordano, Laura Celletti e is Cussigeris Carlo Carta e Ferdinando Sechi. S’Amministratzione Abis, at fatu fintzas àteras bonìficas dae s’amiantu pro tutelare sa salude de is tzitadinos. Intre freàrgiu e martzu de su 2021 dae s’acabu de carrera Gallura a sa localidade Sa Mestia, in zona Pauli ‘e Sali,  a pustis de unu monitoràgiu ambientale est istada fata una regorta de refudos urbanos e no urbanos, de tipu normale e ispetziale, pro unu totale de 800 chilos de refudos indiferentziados,  80 chilos de plàstica, 280 chilos de ingombrantes, 80 chilos de bidru, 350 chilos de ferru, 3 baterias de màchina e 920 chilos de gommas. In sa zona fiat presente dae tempus meda fintzas una cantidade manna de amiantu, pro unu totale de 20.740 chilos, ispèrdidos cun un’ispesa de 25 mìgia èuros.

Fintzas in custu casu est istadu risòlvidu unu problema chi est istadu sinnaladu bortas meda in is annos dae is òrganos cumpetentes, dae is tzitadinos e dae is assòtzios. 

Sunt istadas fatas fintzas bonìficas prus piticas, in logos meda, dae ditas ispetzializadas, e aunidas pro  ridùere s’ispesa, ca faghende.ddas a una a una resurtant prus caras. Intre is zonas bonificadas ddu est fintzas una discàrriga chi fiat istada agatada in Santu Giuanne de Sinis in una die ecològica.

(M.G.S.)

Tipo di notizia: 
notizie