25 de santandria. Inaugurada in Crabas s’installatzione de is iscarpitas rujas pro nàrrere NONO a su feminitzìdiu

Image: 

 

 

Crabas narat NONO a su feminitzìdiu e ddu faet inaugurende un’òpera pùblica in una de is pratzas de sa bidda Sete iscarpitas rujas, sìmbulu de sa Die internatzionale contras de sa violèntzia a is fèminas, sunt istadas postas in una panchina in sa pratza Don Sturzo, in ue est istada aplicada una targa chi narat: “In ammentu de totu is fèminas mortas pro manu violenta dae chie naraiat de ddas istimare, a manera chi is istòrias issoro non nche afunghent in su silèntziu ma movent is cussèntzias e tzivilidade”.

Sa tzerimònia de inauguratzione est istada ghiada dae sa Vitze-Sìndiga Alessandra Pinna, chi at faeddadu de s’istòria de sa nàschida de sa Die internatzionale chi oe est tzelebrada, paris cun s’Assessora a is Polìticas sotziales, sanitàrias e assistentziales Laura Celletti.

“Su problema de sa violèntzia de gènere est ancora atuale meda, mancari is vàrios provedimentos normativos in contu de su tema e is cunventziones Onu chi reconnoschent formas de violèntzia comente  una violatzione de is deretos umanos, ancora oe is formas de discriminatzione non sunt finidas e si manifestant in tantas maneras, a  partire dae sa violèntzia psicològica pro arribare a cussa econòmica, sessuale e fìsica. Custa installatzione cheret èssere un’atu de riverèntzia in is cunfrontos de is vìtimas de feminitzìdiu e un’ammonimentu,  pro chi si respetent is deretos de is fèminas e si fatzant passos in dae in antis in su caminu de sa sotziedade, ancora prena de modellos culturales patriarcales”  at naradu sa Vitze-Sìndiga Alessandra Pinna.

“S’impignu de sa sotziedade tzivile e de is istitutziones devet èssere ogni die finalizadu a si opònnere a sa violèntzia contra is fèminas e a cara a unu mundu chi reconnoschet su gènere feminile a sa matessi manera de cussu maschile. Dae sa prima die de ghennàrgiu a su 20 de santandria, ant mortu 104 fèminas, 88 de custas in famìllia o in s’àmbitu de is amighèntzias. Custos nùmeros atestant chi sa sotziedade nostra est ancora prena de modellos in contu de su possessu de su carenadu de sa fèmina. Tenimus totu su dovere de partetzipare a sa luta pro eliminare is cumportamentos violentos” at decraradu s’Assessora a is Polìticas sotziales, sanitàrias e assistentziales Laura Celletti.

S’òpera est istada curada dae s’artista Ivana Loi, chi at fatu cun sa tzeràmica is modellos de is iscarpas de is fèminas.

“Cun s’arte  mia apo chircadu de rapresentare unu tema chi m’est a coro meda. Apo chèrridu rèndere ùnica ogni iscarpa pro rapresentare s’unitzidade de is fèminas chi ant subidu violèntzia – at decraradu Ivana Loi -. S’òpera est comente una boghe muda chi cheret sensibilizare sa sotziedade nostra pro chi si pòngiat fine a sa tragèdia de is fèminas chi perdent sa vida pro neghe de sa violèntzia de gènere”.

S’installatzione inaugurada oe in Crabas si agiunghet a is panchinas rujas su 25 de santandria passadu aiant pintadu is istudiantes de s’Istitutu cumprensivu de Crabas. Unu signu in prus pro nàrrere NONO a su feminitzìdiu.

Presente su Sìndigu Andrea Abis, chi at marcadu s’importu de àere postu s’òpera in una pratza frecuentada meda, ca s’installatzione “devet tènnere un’impatu de importu in chie la bidet, devet fàghere pensare”.

Fiant presentes fintzas Giorgio Cadeddu, frade de Daniela Cadeddu, sa fèmina de Crabas morta in su mese de freàrgiu, Brunella Salis, operadora de biblioteca e rapresentante de sa Cooperativa Gli Scapigliati chi at leadu parte a s’organizatzione de s’eventu e is Assessores Carlo Trincas, Enrico Giordano e Marco Mascia.

S’ammentat chi is fèminas in dificultade podent telefonare a su nùmeru 1522 o puru cuntatare su Tzentru anti-violèntzia Donna Eleonora de Aristanis a su nùmeru 0783 71286.

(M.G.S.)

 

Tipo di notizia: 
notizie