Foto Foto Foto Foto Foto Foto

SOLANAS

FRATZIONI DE CRABAS

Una pariga de novas istòricas


Solanas est una bidda chi s’agatat aprigu de sa costa centru ocidentali de sa Sardigna, acanta acanta de su golfu de Aristanis, de sa foxi de su frùmini Tirsu e de sa citadi de Aristanis etotu, acanta de Crabas, bidda chi, a dii de oi, ndi est fratzioni de importu. 

 

Solanas in s’Edadi de Mesu fiat una biddixedda e ddi naraiant “Salanis”.

Su logu innui fiat nàscia custa biddixedda fiat meda populau, giai de su tempus de is fenìcius, poita fiat una partidura de Tharrus, citadi de importu mannu inguni acanta.

Sa bidda in s’Edadi de Mesu fiat parti de sa Curadoria de su Campidanu Majori o de Cabras, me in su rènniu de is giùigis de Arborea, a su rei de custu Istadu, Gonàrio Comita de Gunale, a s’incumentzu de su XI sèculu, ddi naraiant “de Salanis” incapat a inditai ca ndi aproliaiat de custa bidda.

Sa bidda de (“villa” - bidda)  Solanas , meda bortas, aiat  patiu  de is fatus de sa bidda acanta, (“villa” – bidda) de Crabas.

In s’annu 1324 fiat nàsciu su Rènniu de Sardigna, auniu a sa Corona de Aragona, in antis alleau e a pustis nemigu de su Rènniu de Arborea.

Is chi arrapresentaiant Solanas aiant pigau parti a sa “Corona de Curadoria”po sa paxi abarrada pagu de s’annu 1388 intra de is duus Istadus in gherra.

Impiticau po nexi de sa gherra su Rènniu de Arborea, in s’annu 1410, Solanas  si fiat fata biddixedda de su Rènniu catalanu-aragonesu de Sardigna.

A pustis, is biddas de sa chi fiat sa Curadoria de su Campidanu Majori, impari a cussas chi fiant in is Curadorias de su Campidanu de Simaxis e de su Campidanu de Milis, fiant intradas in su Marchesau de Aristanis e cuncèdias a Leonardo Cubello.

Ispaciada sa famìllia Cubello, in su 1470, su Marchesau de Aristanis fiat passau a Leonardo d’Alagòn, de s’erèntzia de is ùrtimus giùigis de Arborea, chi si fiat procramau “defensori de is Sardus” chi, perou, si dd’aiant cunfiscau su 15 de Santu Aini de su 1477, a pustis de s’arribellada cosa sua a su Visu-rei aragonesu, Nicolò Carros de Arborea. Custu si fiat pigau incuru po chi Giuanni II “Su chentza de fidi” essit cundannau Leonardo d’Alagòn po delitu de maestadi e po fellonia. Su feudatàriu sardu aiat mòviu aici una arreghèscia chi, a s’incumentzu aiat biu is aragonesus incurtillaus in Casteddu e in S’Alighera, ma chi, a sa fini, fiat acabada mali cun sa batalla de Macumere de su 19 de maju de su 1478, candu is rebellus sardus aiant pèrdiu.

Leonardo de Alagòn, cun is pagus fidelis abarraus, si nci fiat fuiu a Bosa po si nci andai a Genova, ma candu fiant in mari dd’aiant traixu e  intregau a s’ammiràlliu catalanu-aragonesu Giovanni Vilamarì, chi dd’aiat portau me in Valencia, in su presoni de Xàtiva, innui fiat abarrau fintzas a  si morri, in su 1494.

Po mori de sa pregunta de is citadinus de Aristanis de lassai auniu su fèudu, in su 1497, Ferdinandu su Catòlicu etotu aiat pigau su tìtulu de Marchesu de Aristanis e aiat postu impari una borta po totus, su fèudu me in su Patrimòniu Reali, istituendi sa càrriga de “arricidori de su Marchesau de Aristanis e cussòrgia de su Gocèanu” (1481-1560), mudada, a pustis, a “Regidori de sa tesoreria generali de su Rènniu”.

Est de crei ca a Solanas, in s’edadi moderna, dd’apant atacada medas bortas is piratas barbarescus chi praticaiant su mari e nci intraiant me in is Campidanus po fai bardanas de cali si siat arratza.

In s’annu 1647 un’iscussura manna de pibitziris aiat portau dannus mannus a sa messaria e a s’economia de su logu.

In s’annu 1652 sa bidda fiat tocada de pesta.

Po nexi de custas  disgràtzias sa bidda aiat arriscau de si spopulai, ma sa fortza e s’ànimu de is bividoris aiat poderau e sa comunidadi fiat abarrada aunida apari.

In s’annu 1767, Solanas  fiat intrada a fai parti de su Marchesau de Arcais , chi si fiat formau cun is terras chi fadiant giai parti de su Marchesau de Aristanis, chi is intradas ddas aiant giai assinnadas a su feudatàriu nou, Damianu Nurra, impari a su tìtulu de Marchesu de Arcàis.

Is cunditzionis noas fiant grais meda po Solanas, e po totu is biddas de is tres Campidanus (Crabas, Milis, Simaxis), tanti chi is vassallus si fiant arrefudaus de pagai is tributus feudalis.

Faci a  su 1780-1785, e cun su passai de is annus, peliaiant sèmpiri de prus a sa populatzioni de pagai atrus agràvius a prus de cussus chi giai nci aiant, fendi nasci murrùngius e iscontròrius, su tanti de portai a sa populatzioni a s’opressioni e a depi pagai a marolla is diritus baronalis.

In su mesi de austu de su 1789, sa “villa”de Solanas, fèudu de su Marchesu de Arcais, aiat arrefudau de pagai e de ghetai me in is magasinus feudalis is “diritus baronalis” . Unus otanta solanesus, òminis e fèminas, si fiant furriaus mali, candu cincu sordaus aiant provau a ddus fai ponni in menti cun sa fortza e a ddis fai pagai su chi ddis fiat pediu, is solanesus arrennegaus meda, aiant obrigau a is sordaus a s’arretirai e a lassai a perdi cali si siat atzioni contra de issus.

S’esèmpiu de Solanas dd’aiat sighiu fintzas sa genti acanta de Donigala , mancai sena de umperai sa fortza.

S’atu de arrebellada de is solanesus, in dònnia manera non fiat abarrau sena de castigus: is cumandantis de su movimentu populari Franciscu Ennas, Pissenti Muscas, Giuanni Marras e Luisu Ligia aiant pagau,e a prètziu mannu puru, is ameletzus fatus a is tròparas de su Rei, tanti chi a su primu dd’iant cundennau a dexi annus de presoni, su de duus a cincu e totu is atrus a tres annus.

Mortu su Marchesu Damianu Nurra, su fèudu fiat passau a su nebodi Franciscu Flores, chi si dd’iant arriscatau in su mesi de maju de s’annu 1838.

Cun su decretu de su Rei n.19 de su 5 de gennarxu de su 1938, su Comunu de Solanas  dd’iant iscancellau e postu impari a su de Crabas, chi ndi est a dii de oi fratzioni de importu cun prus o mancu 1.150 bividoris.  

Circa e traballu: Dot.Marco Meli – Servìtzius Demogràficus de su Comunu de Crabas

 

 

 

Comune di Cabras - Piazza Eleonora d'Arborea,1 - 09072 Cabras (OR) - Tel. 0783.3971
Email PEC: comunedicabras@pec.it (Attiva sino al 19-09-2016) - protocollo@pec.comune.cabras.or.it (nuova PEC da utilizzare a decorrere dal 19-09-2016)